🔴 10 نصائح ذهبية لأي واحد باغي يبدا مشروع تربية الدواجن 🐔
أنا غادي نقول ليك شي نصائح من القلب، ومن تجربة، باش ما تطيحش فالغلط وتضيع فلوسك، حيت تربية الدجاج راه رزق، ولكن خاصها العقل والصبر:
✅ 1. البداية البسيطة هي سر النجاح
ما تبداش بكمية كبيرة…
بدا بـ 10 حتى 20 دجاجة، تعلم معاهم، فهم التعامل مع الأمراض، العلف …
فاش تحس براسك وليتي فاهم، زيد العدد.
✅ 2. السلالة المناسبة لمشروعك
خاصك تحدد الهدف ديالك:
باغي البيض المائدة ؟ → #ليجورن، #سوسيكس، #نيوهامبشر، #أوسترالورب
باغي كتاكيت وبيض مخصب؟ → السلالات الحرة ( #وينداوت، #فورويرك، …السلالات نادرة و قليلة فالسوق)
باغي دجاج اللحم؟ → السلالات المهجنة
كل مشروع وعندو السلالة اللي تناسبه.
✅ 3. النظافة… النظافة… النظافة!
هاذي أكبر سر عند أي مربي ناجح:
الحظيرة تكون جافة
تهوية مزيانة (ماشي ريح باردة، ولكن هواء يدخل ويخرج)
عقم رجليك قبل ما تدخل، وخاص أي واحد يدخل للحظيرة يدير نفس الشي.
✅ 4. العلف هو كلشي
علف متوازن:
كتاكيت صغار → بروتين 20-23%
دجاج بياض → بروتين 16-18% + كالسيوم
ما تبقاش تبدل العلف بزاف، استقر على نوع معروف.
✅ 5. الماء النظيف طول اليوم
الما خاصو يكون بارد ونقي
مرة في السيمانة زيد خل التفاح الطبيعي باش ينقي الأمعاء
الفيتامينات كديرها كل شهر مرة ولا وقت المرض.
✅ 6. الوقاية خير من العلاج
ما تمشيش للسوق وتدخل للحظيرة بلا تعقيم
ما تستقبل حتى واحد داخل لحظيرتك بلا ما يبدل حوايجو
الطيور البرية (الحمام، الغربان) → سد عليهم الحظيرة
ديما كون عندك Tylosin أو Tilmicosin فالدواء، لأن الأمراض التنفسية كتجي فجأة.
✅ 7. ضوء + وقت للراحة
إضاءة 14 ساعة يوميا للدجاج البياض
خلي الدجاج يرتاح فالليل، الضوء الأبيض طول الليل كيضرهم.
✅ 8.راقب الوسخ (البراز):
✅ براز بني عادي مع الأبيض: مزيان.
✅ براز أخضر: يا إما مريض يا إما ما شبعش.
✅ براز مائي أبيض: التهاب فالأمعاء.
✅ براز أسود: نزيف ولا سموم.
✅ براز فيه دم: كوكسيديا.
شتي تغيير، تدخل بسرعة.
✅ 9. لا تستحيي من السؤال
تواصل مع مربيين في مجموعات فايسبوك.
سول طبيب بيطري إيلا لقيتي شي حاجة ماشي هي هاديك.
ما تعالجش عشوائيًا… خدم دماغك قبل يديك.
⛔ ما تبقاش تجرب في الدجاج، راه كاين أرواح وفلوسك.
✅ 10 . الصبر هو الأساس:
تربية الدواجن فيها الربح… ولكن خاص الصبر
أمراض… خسائر… موت… جزء من الرحلة
ولكن تعلم… ثبت… وغادي تربح بإذن الله.
💡 آخر نصيحة من القلب:
متخليش الفلوس هي الهدف الوحيد…
عْشَق الميدان… شوف دجاجاتك وكأنهم جزء من حياتك..... وغادي يجيك الرزق إن شاء الله!!
